Рано утрината на ден 22.11.2009 (недела), во 5:45 часот, пред дворот на елитниот општински електро машински училишен центар ,,Св. Наум Охридски” во Охрид, петчлена група членови на С.П.К. ,,Магаро” (Кирил, Жура, Васко, Марјан и Диме), го започна своето патување кон пл.Баба со цел искачување на врвот Пелистер.
 По пристигнувањето во пазувите на пл.Баба, возилото го оставивме на паркингот пред хотел ,,Молика”(1430 м.н.в.) и во 7:05  започнавме да пешачиме кон планинарскиот дом Копанки(1615м.н.в.). По половина саат се наоѓавме пред домот, каде се напивме топол чај и од домарот добивме информација за состојбата на патеката Камењар, која што беше претходно избрана како патека за искачување до врвот. Во 7:45 започнавме со искачување низ борова шума, по маркирана патека Камењар, за по нецел час во 8:43 да излеземе од шумата, кај местото Извидница (1936 м.н.в.).

На 15 октомври 2009, петчлена група на СПК ”Магаро”, составена од Мите, Гоце, Кристијан, Игор и Марјан, заминаа на планинарска тура до месноста Студино. Групата тргна од бензиската пумпа Билјанини Извори во 7 и 30. По еден час пешачење, се искачивме на Елен врв од каде се гледа целиот град. По кратка пауза продолживме накај станицата над селото Горно Коњско. Направивме мала пауза, која ја искористивме за мал час по ориентација и одредување на нашата местоположба на карта. Тргнавме накај Студино. Временските услови за време на целата тура беа одлични. а околу пладне пристигнавме во Студино. Се подзасолнивме од ветерот, направивме пауза и тргнавме за назад. Се враќавме по Досадната патека. По околу седум  часа   испешачивме  дваесет километри.

Tекст: Димитров Димитри